Ang Pagpapakilala

Posted on December 2, 2013 by Charlie

Ang OFW

charliemontemayorAko nga pala si Charlie Montemayor, isang OFW dito sa Palau. May dalawang anak na nasa Baguio sa kasalukuyan kasama si misis. Ilang taon na rin ang nakalipas mula nuong nakatapak ako sa isla ng Palau taong 2003. Yun ang unang labas ko nang bansa. Eto na rin yata ang unang pagkakataon na malayo ako sa aking pamilya, at sana ito na ang huli. Nakakalungkot, Oo. Pero kailangan, para sa kinabukasan ng mga bata.

Ang Forumer

Nakilala ako bilang si LordCM sa isang forum ng mga taga-Baguio, isa ito sa mga naging paraan ko para kahit papaano mabawasan ang homesickness na nararanasan, ang makipagkwentuhan online. Hindi naman ako taga-Baguio, nag-aral lang ako dun ng ilang taon pero sadyang malapit yata ako sa mga taga-baguio at kahit di ako taga duon ay nakikisalamuha pa rin ako sa kanila kahit sa forum lang. LordCM ang naging alias ko sa forum, dahil na rin sa isang section ng forum na tinawag nilang Dungeon. Kung saan andun lahat ng kalokohan at kung saan isinilang ang Dungeon Lord, Ako yun!

Ang Blogero

LordCM na rin ang ginamit ko nuong natutunan kong magblog. Bukod sa forum, blogging na rin ang naging isa sa mga karamay ko sa tuwing nag-iisa. Sa mundo ng blogosperyo na rin ako nakakilala ng maraming-maraming kaibigan. Di ko man sila nakikita ng personal, anduon pa rin yung pagmamalasakit ng bawat isa na makikita mo lang sa tunay na magkakaibigan.

Ang Kabuuan

Bukod sa pagtatrabaho sa araw, sa blogging ko na ibinuhos ang mga natitirang oras ko sa bawat araw, pampalipas oras sabi nga ng ilan. Dito ko na rin nabuo ang Isang Minutong SMILE na may layuning magbigay kasiyahan sa mas nangangailangan sa tulong na rin ng mga kaibigan blogero. Bukod sa pagbibigay saya, nabuo rin ang Ask Pinoy Bloggers upang tumulong naman sa mga baguhan sa mundo ng blogosperyo. Isa itong grupo ng mga bloggers kung saan maaari kang magtanong, sumagot at matuto ng pasikot-sikot ng blogging.

Sa ngayon, pilit akong naghahanap ng posibleng pagkakitaan bukod sa pagtatrabaho. Hindi naman lingid sa ating kaalaman na ang karamihang OFW ay nangangarap na minsan, darating ang araw na uuwi tayo sa ating bansang sinilangan, at tuluyan nang makasama ng habambuhay ang minsan na nating iniwang mga mahal sa buhay.

Posted in Articles | Tagged , , | Leave a comment

10 Dahilan kung Bakit Iniiwasan ka ng Crush Mo

Posted on October 22, 2013 by Charlie

Natanong mo na ba sa sarili mo kung bakit sa dinami-dami ng iiwas sayo ay yung crush mo pa? Kainis no?! Pilit mong nilalapitan para man lang kahit papaano makita mo sya o magkaruon ka ng pagkakataon na makausap sya, makakwentuhan at yung posibilidad na masabi mo sa kanya ung nararamdaman mo. Pero hindi mangyayari, kasi kapag nakita ka na nya, lumalayo na sya, balewala ka na parang wala syang nakita, minsan isnab pa!

Sa tutuo lang maraming dahilan kung bakit ka iniiwasan ng crush mo pero ang babanggitin ko lang siguro ay yung maiisip ko, ang hirap kayang mag-isip!

crush

Ano gusto mo unahin? Good o Bad na dahilan? Yung bad na lang siguro muna, para good yung mahuhuli, happy ending pa rin kahit iniwasan ka.

Bad na dahilan kung bakit ka iniiwasan ng crush mo

1. Panget ka! hahaha, sorry sa term, pero masakit talaga yung malaman mo n yan ang dahilan kung bakit iniiwasan ka ng crush mo.

2. Melon Amoy, hmmm, kahit sino ata iiwasan ka kung melon kang amoy, maliban na lang kung amoy melon ka.

3. Feeling Freddie Aguilar. Di mo alam yan? Sus! kaya ka iniiwasan ng crush mo, kasi doblehin mo ung edad ng crush mo, yun ang tanda mo sa kanya. Pero hindi ikaw si Freddie Aguilar, kaya wag feeling.

4. Feeling Pogi. Feeling mo lahat ng crush mo mapapasayo. Yun ang akala mo!

5. Hindi ka lang talaga crush ng crush mo. Yun lang yun! Sumuko ka na!

Wait ah, di pa tapos. Baka kung ano na maisipan mong gawin sa sarili mo nyan, bad yan..maghunos dili ka. Eto na ang good news.

Good na dahilan kung bakit ka iniiwasan ng crush mo, ayan, nangiti ka na!

6. Feeling ng crush mo, wala pa sa tamang panahon na magkasyota sya. Good yan! ibig sabihin lang nun may pag-asa ka..kasi kung wala, maaga pa lang, malamang sinabi nya nang wala kang pag-asa.

7. Crush ka rin nya. Yun oh! kinilig. Minsan kasi ganun yung ibang crush natin, pakipot ba. Kunwari di ka crush kaya iiwasan ka, pero kinilig nung nalaman nyang crush mo sya.

8. Crush ka ng bestfriend nya. Crush pa lang may namumuo nang Love Triangle. Iniiwasan ka nya kasi ayaw nyang mag-away sila ng bestfriend nya, kaya pinapaubaya ka na lang nya sa bestfriend nya. Kalungkot lang, pero ok na rin kasi kung di ka crush ng bestfriend nya malamang kayo na ngayon.

9. Feeling nya hindi sya nararapat sa iyong nararamdaman kaya ka nya iniiwasan. Pero alam mo bang sa pag-iwas nya ay gumagawa na sya ng paraan para maging karapat-dapat sya sayo? Oo, parang teleserye lang yan. Maniwala ka, wala mang Happy Ending, mayroon namang Happily ever after.

10. Umiiwas sya kasi inis sya sayo! Bakit daw kasi crush mo lang sya, tapos sya love ka na nya. It’s unfair!!!

O diba, good na good kahit iniiwasan ka ayos lang, abot hanggang tenga naman ngiti mo.

Paalala : Di ko pa po napanood ang pelikula ni Kim Chiu na Bakit Hindi ka Crush ng Crush Mo. Sariling pag-iisip, obserbasyon at eksperyensya nung binata pa ako ang ginamit ko para mabuo ang nasa taas. Kung may pagkakapareha man, malamang sa alamang, nagkataon lang.

Posted in Articles | Tagged , , | 40 Comments

Pangarap sa Kabila ng Natupad na Pangarap

Posted on May 16, 2011 by Charlie

Minsan na akong nangarap, nangarap na maging isang System Analyst sa isang malakeng kumpanya sa Subic. Hindi ko man ginawa ang lahat pero ibinigay ng mga pagkakataon na maabot ko ito.

Andito na ako sa pangarap ko, sumobra pa nga. Senior System Analyst na ako sa isang pinakamakalakeng kumpanya sa…hindi sa Subic, dito sa Palau.

systems analyst

Hindi lang isa sa pinakamalakeng kumpanya ang napasukan ko dito sa Palau, eto ang pinakamalakeng kumpanya sa Palau. Mahigit 15 stores, kasama ang department stores, groceries store, meron ding restaurant, at ilang hotel na nakakalat sa lungsod ng Palau, meron ding car sales, at car rental, may isang hardware at isang lumberyard, meron ding paupahang apartment at kung ano-ano pa.

Pero eto ako ngayon, naiingit sa iba, inaasam na sana ganun ang trabaho ko tulad ng sa kanila. Ano ba?! Andito na ako sa pangarap ko! Di pa ba ako kuntento? Sa tutuo lang, nagsasawa na ako eh, tinatamad, nangangarap muling sana ganito, ganyan ang trabaho ko.

Alam mo yun? yung trabahong papasok ka ng alas otso ng umaga, trabaho hanggang alas singko ng hapon at pagkatapos uwian na, di ka na mag iisip na bukas may nakapila nang gagawin mo, na bukas deadline mo na at kailangan matapos mo na ang trabaho mo, na bukas itutuloy mo ung di moo natapos, na bukas…at napakarami pang bukas na puro trabaho.

Yung trabaho sana na tulad ng warehouseman, cashier, waiter, tricycle/jeepney driver… Yung trabahong mag iisip ka lang kapag oras ng trabaho, kapag nasa bahay ka ay pahinga na isip mo sa trabaho. Yung ganun, na di tulad ngayon kakauwi mo pa lang galing sa maghapong trabaho, iniisip mo na kung paano ang gagawin mo sa trabaho kinabukasan, iniisip mo na kung paano mo matatapos ang di mo natapos ngayon, na dapat sana ay nakauwi ka na, relax na lang.

butler

O baka may mali lang sa akin kaya nararanasan ko to? Time management kaya?

Pero di na mahalaga yun, ang mahalaga andito ako sa pangarap ko, pinipilit na makuntento, pinipilit na hindi magsawa. Kasi kung tutuparin ko pa yung pinapangarap ko ngayon na trabaho, malamang walang kainin pamilya ko…

Kaya ok na ako dito, pangarap lang yung sinabi ko, at mananatili na lang pangarap at makukuntento na lang ako sa trabahong meron ako ngayon.

Posted in Articles | 16 Comments